Urdu

جاڑا،گرمی،بہار،برسات
ہر رُت میں نیا سَماں نئی بات
جاڑے سے بدن ہے تھرتھراتا
ہر شخص ہے دِن میں دُھوپ کھاتا
پُھوٹیں نئی کونپلیں شجر میں
اک جوش بھرا ہوا ہے سر میں

گرمی نے زمین کو تپایا
بھانے لگا ہر کسی کو سایہ
برسات میں دَل ہیں بادلوں کے
ٹھنڈی ٹھنڈی ہوا کے جھونکے
پیدا کیے اُونٹ،بَیل،گھوڑے
ہرشَے کے بنا دِیے ہیں جوڑے

روشن آنکھیں بنائیں دو دو
قُدرت کی بہار دیکھنے کو
دوہونٹ دیے کہ مُنھ سے بولیں
شکر اس کا کریں زبان کھولیں
ہر شَے اُس نے بنائی نادِر
بے شک ہے خُدا قوی وقادِر

جو چیز خُدا نے ہے بنائی
اُس میں ظاہر ہے خُوش نُمائی
ہرچیز کی ہے ادا نِرالی
حِکمَت سے نہیں ہے کوئی خالی
تاروں بھری رات کیا بنائی
دِن کو بخشی عجب صفائی

خُدا نے ہی پیدا کِیا ہے ہمیں
اُسی نے تو سب کچھ دیا ہے ہمیں
وہی تو بچاتا ہے آفات سے
وہی تو چُھڑاتا ہے خطرات سے
یہ اُونچے پہاڑ اور بہتی ندی
ہے اس کی ہی قدرت کی کاری گری
عطا اس نے قرآن ہم کو کیا
عطا دین وایمان ہم کو کیا
ہمارا وہی ایک معبُود ہے
اُسی کی رضا پانا مقصُود ہے۔
(1)کائنات کا خالِق ومالک کون ہے؟
(2)مصائب ومُشکلات میں ہماری مدد کون کرتا ہے؟
(3)آخری آسمانی کتاب کون سی ہے؟
(4)اُسی کی رضا پانا مقصُود ہے" سے کیا مراد ہے؟